تميّز هالأسبوع بإطلالات خاصّة للنائب زياد أسود. الأولى كانت نتيجتها الاستعانة بسريّة جيش ليأمّن ضهرته من مطعم، والتانية تدخّل فيها أمن الدولة ليهرّبه من شباك المطعم. وهيدا بيقوله عنه «نمر» التيّار. ما بعرف إذا بيعتبروه نمر لأن بيأرغل عجمي، بس أنيواي مش هون الموضوع. جماعة أسود هجمت على المحتجّين وفهمنا منن إنه ما بيحبوا ولاد طرابلس يجوا ع جونيه متل ما جويس عقيقي ما بتحب ولاد عكار يجوا ع بيروت. أخدت التيار 15 سنة ليصير قوّات (يلّي كان يضلّ يتّهمها بالانعزالية) بس بيتر لايت ذان نيفر. بالمقابل، البيان الوزاري خلص وتأكدنا إنه ما عندن ولا أي فكرة عن شو لازم ينعمل ليعالجوا الأزمة. بس يلّي منعرفه عالأكيد إنه رح يرجعوا يعلقوا بسبب خطة الكهربا وعالأرجح ساعتها يتذكر جبران إنه برّي بلطجي. المصارف كل ما إلها عم تقلل خرجيتنا بالدولار، برونو طبال بده يعرف ليه بعد في ناس قادرة تعمل سكي بفاريا، والـ500 كلمة عاملتلي قلق ع قد ما سعر تلفون متظاهرة قلق سمر أبو خليل وراشيل كرم.
جبران باسيل: خطاب الكراهية مستعر من فترة والتعدّي عالتيار متكرّر ومُمَنهج.
حبيبي يلّي خطابه كلّه محبّة وسلام.
زياد أسود: نحنا يلّي عنّا أخلاق ونحنا يلّي منعرف نتخاصم بالسياسة مع الناس بشرف.
بكينا من أخلاق وشرف فيديوز شبابك عم يضربوا الناس ويسبّوهن.
التيار الوطني الحر: التطاول على السياسيّين وحياتهم وكراماتهم غير مقبول ويولّد ردّات فعل عفوية من قبل مناصريهم.
مش حاسّين إنه كتير عاطيين ع حركة أمل لايتلي؟
رائد خوري: أنا أفقر واحد. أنا من عرق جبيني عملت حالي.
منفهم إنه جبينك عرق من الـ40 مليون دولار يلّي عملن سيدروس بنك من هندسات رياض سلامة المالية؟
إنت من طرابلس، شو جايي تعمل هون؟
يا نايبنا سليم، بيقولوا أكلوا قتلة الكلاب لو سمحت.
كاس إمّن واحد يخبّر التاني.
أقوال مأثورة من تلاميذ أكاديمية الحوار والتلاقي
وزير الخارجية: النزوح السوري كلّف لبنان أكتر من 30 مليار دولار حتى الآن.
غير إنه الرقم مش مزبوط، شكلكن ناويين تشحدوا 30 مليار ع ضهر السوريين هلق؟
علي بزّي: أصحاب خمسة مصارف حوّلوا أموالهم الشخصية إلى الخارج وتُقدّر بمليارين و300 مليون دولار.
كيف ناويين تسترجعوا المصاري؟ معقول تبعتوا عليهن شرطة المجلس؟
كتلة الوفاء للمقاومة: طريقة تشكيل الحكومة تفسّر عدم وجود برامج إنقاذية جاهزة لمعالجة الأزمات المالية والاقتصادية.
ويلكم تو ليبانون حزب الله. منعرف دايمًا مشغولين بقضايا أهمّ.
حسن فضل الله: الوقت ليس للمزايدات والناس ملّت كثرة الكلام وقلّة الأفعال.
يعني رح تفرجينا ملفاتك قريبا؟
يلّي قالت إنه انسرق تلفونا وحقه 2000 دولار، هيدي جوعانة فعلا؟
ما يكون مثلا باسيل بزيت وطرابلسي مبارح بسمنة.
زياد أسود… بيفش الخلق.
أقوال مأثورة من كبيرة مراسلات الـotv جويل بو يونس
رئيس جمعية المصارف (ردّاً على سؤال إذا رح يوقفوا يعطوا دولار للمودعين): حسب الظروف.
منيح يلّي ما قلّنا حسب الطقس.
