منبلش بخبرية حلوة.
محكمة التمييز العسكرية طلبت إعادة محاكمة سوزان الحاج.
المهم يطلعلنا راوند تانية من فويسات «حضرة المقدّم والهاكر»
اعترضت سهى بشارة على عودة العميل عامر الفاخوري ع لبنان واتهمت وزير الخارجية جبران باسيل بتأمين الغطا للفاخوري.
العونيين جنوا لأن هني بس قاوموا بهيدا البلد. وقادن بالحملة النسوي الشرس، صوت العهد، ضيف التلفزيونات الدائم، اللي بيفهم سياسة واقتصاد وأمن ورضاعة وحليب وكورن فليكس المقاوم الأول زوزو (يا هيك الرجال) أبو فاضل (يا بلا)
محطات البنزين أضربت نهار لأن ما في دولار بالسوق وما عم تقدر تشتري فيول. بطاقات تشريج الخليوي مقطوعة لأن ما في دولار للمحلات تشتري
بس الليرة بألف خير
بالـ2016 وعد الحريري موظفي تلفزيون المستقبل بحلّ أزمة معاشاتهم. وزبطت معه متل ما عم تزبط معه بكل شي تقريبا من وقت ما قرر يرجع ع لبنان ويتعاطى سياسة. سكّر التلفزيون وقرر يقسّط معاشات الموظفين المكسورة على سنتين
بحب ذكّر إنه هيدا الزلمي واعدنا يطلعنا من الأزمة الاقتصادية. غود لاك لبنان!
رئيس الجمهورية قرر يأسس «أكاديمية الانسان للتلاقي والحوار» لتعزيز التقارب بين الناس
ورح يعطي intensive course لصهره وزير الخارجية جبران باسيل المعروف بتشجيعه على العيش المشترك والوحدة الوطنية
من بعد 8 سنين ع تسكير طريق الإسكوا لأسباب أمنية، قررت وزيرة الداخلية إعادة فتحها لتعطي المواطنين «شوية راحة»
بس بلبنان بينعمل مؤتمر صحفي للمناسبة، وبتنطرح فيه أسئلة وجودية عن تأثير إزالة بلوكات الباطون على تطور وإزدهار الشعوب الحاملة للجينات الفينيقية
مجلس الانماء والاعمار بلش يقص الشجر بمرج بسري تمهيدا لبناء السد
الوزارات المعنية مغطاية المخالفات لأن هيك البنك الدولي بده ولأن ما حدا بيفهم بالسدود غير وزرا الطاقة تبع «لبنان القوي».
بلشوا مناقشة موازنة الـ2020 بالحكومة (حلو النشاط). ومن ضمن الاصلاحات اللي اقترحها وزير الخارجية فرض ضريبة على السفر لتشجيع السياحة الداخلية
عزيزي، وين بتحب نسوح تحديداً؟ ع جبال الزبالة، بالمي الملوثة، بالعجقة 3 ساعات بين صور وبيروت أو بليلة بأوتيل بتكلفنا قد سفرة ع تركيا؟
تمّ تعيين خي مرته للنائب آلان عون بالمجلس الأعلى للخصخصة وبنت أخته للنائب سليم عون بمجلس إدارة إيدال
بس جبران باسيل بده يحارب الإقطاع لأنه «جرثومة تمنع بناء الدولة»
الإعلام اللبناني كان مشغول هالأسبوع بقضايا مصيرية:
تجاعيد كارول سماحة اللي ظهرت بصورة نشرتها ع تويتر. معقول مرا بالـ2019 يكون عندها تجاعيد!
عمادة بنتها لنانسي عجرم وتأثر الجمهور بصورة العيلة وشبه ولاد نانسي لإمهن وبيهن.
طلاق ن.ن.ن. المعروفة بـ نادين نسيب نجيم، واللي خصصتله الجديد push notification وصلت ع تلفوناتنا.
وقوع عاصي الحلاني عن الحصان وسيلفيز زواره معه هوي وموّرم ومزرق ليطمنونا إنه بخير.
عيد ميلاد وائل كفوري اللي ما عاد حدا جاب سيرة اتهام زوجته السابقة بتعنيفها من بعد ما تظاهروا شباب زحلة «مربى الأسودة» وزادوا خط أحمر ع لائحة الخطوط الحمر بالبلد: #وائل_كفوري_خط_أحمر
