البلد عم ينهار. ليتريلي. الليرة وصلت للـ2300. المصارف حاجزة مصاري الناس. الغلا بالأسعار شي خيالي. الـNouba صار بـ500. في مواد ومنتجات عم تنقطع من السوق. حتى الأدوية والأجهزة الطبية عم تنفقد. المؤسسات عم تخفض معاشات موظفينها أو عم تطردهم. رايحين عالإنهيار وجماعة السلطة عم بيفاوضوا بعض ع حصص بالحكومة ع قاعدة عطيني لأعطيك. وبما إنه عندي بس 500 كلمة والدني أولويات، رح إكتفي بتعليق واحد عن الشباب يلّي نزلوا يقولولنا إنن «شيعة شيعة شيعة» وبدّن «7 أيار جديد».
جماعة حزب الله وحركة أمل هجموا على المتظاهرين على الرينغ وببعلبك وصور.
وكانت هجمة كتير عفوية تخلّلها رمي حجارة محبّة، ضرب بالعصي بإسم العيش المشترك وتكسير خيم وحرق سيارات حفاظاً على الوحدة الوطنية.
توتّرت الأوضاع كمان ببكفيا بين التيار والكتائب، وبالشياح وعين الرمانة بين القوات والحزب والحركة، وبطرابلس بين المتظاهرين والجيش.
تاني يوم نزلوا أمهات الشياح وعين الرمانة ليقولولن كلّن: «ما أغلى من الولد إلا توحيد البلد».
توقيف المتظاهرين بعده مكمّل وكان أبرزهم توقيف أطفال بحمّانا.
بس عم بيكون صعب عليهم يوقفوا حدا من المعتدين على المتظاهرين.
مستوردي النفط وأصحاب محطات البنزين أعلنوا الإضراب المفتوح.
سبب إضافي لنقول: «تسقط الإحتكارات».
الهيئات الاقتصادية برئاسة محمد شقير أعلنت الإضراب. رجعت تراجعت عن قرارها.
شكله الإضراب كان فكرة متل فكرة ضريبة الـ6$ ع واتساب.
نبيه برّي ضد الممارسات «الديكتاتورية في الشارع» وكتلة الوفاء للمقاومة ضد «استنفار النزعات الطائفية».
بس مع الاعتداءات العفوية على الناس وتذكيرن بشيعيّتهم عند الضرورة.
الحريري ما بدّه يرجع ع رئاسة الحكومة.
فقرّروا يجيبوا حدا نسخة طبق الأصل عنّه: سمير الخطيب.
السفير الروسي: الموقف الروسي لا يرحّب بخطوات الحراك كقطع الطرقات.
والثورة لا ترحّب بالتدخّلات الروسية.
نجيب ميقاتي: كلن يعني كلن وأنا إذا كنت واحد منن.
عزيزي، إنت مش ناسيينلك الـ500$ تبع سيليس.
حسن فضل الله: نحنا مش جزء من الفساد لأن بالوقت يلّي كانوا عم يبنوا فيه هيدي المنظومة، نحنا كنّا عم نحمي البلد.
طب بدل ما تدافعوا بهالشراسة عن المنظومة، اتركونا نسقطها.
ماريو عون: ما زال في جبل ببعبدا إسمه ميشال عون، ما رح تشوفوا الإنهيار بحياتكن.
أكيد، منكون رحنا فيها قبل ما يوصل.
- متظاهر: إبن عمّي ماخد وحدة مسيحية. - متظاهر تاني: من أمتين هيدي؟ يخرب بيتك شو كذاب.
وداد حلواني: أصعب شي بالحياة إنك تنطر حدا بتحبّه يجي.
مجموعة أقوال مأثورة من الثورة.
نقيب أصحاب المطاعم: إذا كل لبناني مغترب أرسل 3000$ لعائلته ينتعش السوق اللبناني بالدولار.
يعني يا محلا مستر ليبانون وقت اقترح كل لبناني يلمّ كيس زبالة ويحطّه ببيته.
المنار ناقلة خبر عنوانه: الإحساس بالجوع بيطوّل العمر.
هيدا الإعلام المسؤول يلي عم ببلّش يحضّر الناس.
بالأخبار الفنية،
من بعد ليلى عبد اللطيف، قرّر نيشان يستضيف سهى قيقانو. ناطرين منّه شربل خليل على راس فوج من الLGBTQ.
ماغي بوغصن بدها تنتف أي حدا ما بيخلّيها تبوس إيد حماتها.
ووسام حنّا عم بيثور بس بنفس الوقت ما عنده مشكلة يرجع الحريري.
