عرفنا بـ7 حالات انتحار خلال الأسبوع، معظمن مرتبطين بالأزمة الاقتصادية. المصارف بعدها حاجزة مصرياتنا وصارت عم تعطينا خرجية قريبة على يلّي كنا ناخدها من أهلنا. وحاكم مصرف لبنان بعده عم ياخد إجراءات ليأمّن ربح للمصارف بدون ما حدا يقرّب صوبه. أكتر من 60 شركة تقدمت بطلب صرف جماعي وحوالي 160 ألف موظف خسروا شغلن بشهر. السلطة بكلّ أطرافها ما عم تعمل شي ويلّي عم نسمعه لهلّق عبارة عن شي بيشبه «شعر» رملاء نكد. رئيس الجمهورية دعي وأخيرًا للاستشارات النيابية الإثنين. وبما إنه ما في ولا أي خطة لحلّ الأزمة، بلّشنا نطرح خطط لينسمحلي أطلع فوق الـ500 كلمة.
التوقيفات مستمرّة والاعتداءات عالمتظاهرين مكمّلة والاستدعاءات ع مكتب مكافحة جرائم المعلوماتية بلّشت.
بس دغري بينمغصوا إذا قلنالن إنه لبنان عم يتحوّل لدولة بوليسية.
قوى الأمن: قطع الطرقات يعتبر مخالفاً للقانون.
شكلن بقوى الأمن عندن قانون ما حدا بيعرفه غيرن.
شتّت ومتل كلّ مرة علقت الناس عالطريق لساعات والتلاميذ علقوا بالمدارس بالناعمة.
أصلا هيك بلّشت بسوريا.
قبضنا بس ما قدرنا نسحب معاشاتنا لأن المصارف مانعينا.
والموظفة بتقلنا «اشكروا ربكن بعدنا عم نخلّيكن تسحبوا 200$ بالأسبوع».
«الدولية للمعلومات»: 61,924 لبناني هاجروا بـ2019 مقارنة بــ 41,766 بـ2018.
حدا يطمّن ماريو عون إذا الإسلام أكتر من المسيحيي.
ما بقى تسألونا ليه نازلين. إنت بتعرفي وتلفزيونكن بيعرف.
مين نادين لبكي؟ ما بعرفها.
«شو هالأكل الخرا! عفواً سامحوني. بلا السبّ. عيب السبّ. ما عم يعطونا مصرياتنا بس عيب السبّ. سرقونا بس عيب السبّ. إيه كس إختن كلّن».
مجموعة أقوال مأثورة من الثورة.
سمير الخطيب بعده المرشّح الأوّل لرئاسة الحكومة.
بس ما حدا بيعرف إذا الحظ رح يبتسم لفؤاد مخزومي من بعد ما ابتسمله بعد طول انتظار بالنيابة. أو إذا الحريري رح «ينجبر» يرجع مع إنه هوي مش طايق.
ميشال عون: لمحاكمة من يقوم بالترويج السيّئ للعملة الوطنية.
كلنا ناطرين تحاكم المصارف وحاكمها.
الحريري طلب من كذا دولة تساعدنا لأن عنّا نقص بالسيولة وما بده يانا ننقطع من الأكل والأدوية.
طب طلوب كمان من يلّي سرقونا يردّولنا مصرياتنا.
محمد رعد: ما لم يأخذه عدونا بحربين لن نعطيه إياه بالاقتصاد.
طب فشّولنا خلقنا وحاربوا الفساد متل ما حاربتوا إسرائيل.
وليد جنبلاط: كلّ ما يتمّ الآن هو مخالف للدستور.
كأن جنبلاط عم يعبط الدستور هوي ونايم قد ما ممسّك فيه هالفترة.
جبران باسيل معتبر إنه عم بيضحي بحاله لأن ما رح يعمل وزير بالحكومة المقبلة.
مش أحسن ما تضحي بالبلد؟
- راشيل كرم لمتظاهر: سمّيلي وزير من خارج السياسيين. - المتظاهر: ملحم خلف منيح وزير عدل. - راشيل: إنت باسم مين عم تحكي؟ مين بتمثل لتسمّي؟
نيشان بحلقة عن الانتحار: It’s okay not to be okay. Go see a therapist
مذيعة علـotv: هالقلّة المربى. البنات للأسف، بس أطّلع بصور لبنات بالمظاهرات بقول معقول؟!
مجموعة أقوال مأثورة من الإعلام.
بالأخبار الفنية،
نادين الراسي تحدّت الظروف الاقتصادية الصعبة وخطبت، عقبالكن.
زين العمر طلعله أوتوغراف من رئيس الجمهورية.
ورغم كل يلّي عم نمرق فيه، جورج خباز رح يبلّش بعرض مسرحية جديدة.
