صار فينا نقول إنه فتنا رسمياً بالبانيك مود. أزمة اقتصادية ومالية، كورونا، عاصفة التنّين ومار شربل بالمطار. هيدا الأسبوع كان قد قرن. بعد ناقصه زلزال ليكمل بما إنه النيزك مرق حد الأرض وكوّع. البانيك بلّشت بفويس نوت انتشر عن إصابة «إنفلوينسر» بالكورونا، ومن وقتها ما عاد حدا ما انهلع. الإصابات زادت بنسبة 30% باليوم، 77 حالة لهلأ، 3 حالات وفاة وحالة شفاء وحدة. المستشفيات منها مجهّزة لتتعامل مع هالعدد الكبير من المرضى، ما في أجهزة تنفّس كافية، وطبعاً رياض سلامة بعده عم يوعد بتأمين المصاري اللازمة. لو شي بنك طالبن، كان عملّه هندسة مالية سريعة من العين دي قبل العين دي.
البانيك ضرب كمان الإعلام. دولة الـmtv أعلنت حال الطوارئ، الجديد وأل. بي. سي. عم بيعيّطوا عالناس ليبقوا ببيوتن، والناس هجمت عالسوبرماركت كأن ما في بكرا. وحده رئيس حكومتنا حافظ ع رباطة جأشه وطلع بكامل أناقته يقلّنا إنه نحنا نموذج بالتعاطي مع هيدي الأزمة. بالنموذج قصده إنه بقينا فاتحين المطار للرحلات من البلاد الموبوءة لحدّ ما الوباء قلّنا دخيلكن رحموا حالكن. وإنه بقينا كم يوم فاتحين المطاعم والمولات بس سكرنا الحدائق العامة (ما حدا يتفاجأ) والمتاحف (بما إنه ما مننقلع منن).
سكروا هالمطار يا نَوَر يا جحاش يا صرامي.
الكون كلّو موجود بالبيت. بتمنّى من الجميع التمسّك بهذه الفكرة والتنسّك لمرحلة حتى إشعار آخر.
المرأة هي هدف الرجل، هي جرح الرجل وهي صراع الرجل مع الرجل.
أقوال مأثورة ليوسف الخال
البانيك ما قدرت تطال البروفيسور على ولا أي صعيد. طلع يخبرنا إنه «علّقنا» دفع ديوننا متل كأن عم بيخبرنا إنه لاقى علاج للكورونا. وتصفيق حارّ وهيك. ما عرفنا طبعاً شو الخطة يلي عم بيحضروها الشباب. بس وزير المال طمنّا إنه رح تلبّي توصيات صندوق النقد بس مش يعني رح ناخد منه مصاري. إذا حدا فهم ليه بدنا نعمل هيك بحالنا بدون ما يطلعلنا شي بالمقابل، بليز يفسّرلي. طمنّا كمان إنه رياض سلامة باقي متله متل حبيب قلبه سعر الصرف الرسمي. وزميله وزير الطاقة طمنّا إنه رح يثبتوا سعر تنكة البنزين لياخدوا منا ضريبة بلا ما نحسّ. ما قالها هيك، بس فهمنا شو قصده.
هالأخبار متل ورقة النعوة والمشكلة إنه قاعدين بالبيوت يعني مضطرين نحضر ونسمع.
تحية للزميل الصديق عبدو الحلو اللي نجح بإقناع الطب بقوّة مار شربل.
كوني امرأة خطرة.
أقوال مأثورة لجويل بو يونس
البانيك كمان ضربت العدلية. التشكيلات القضائية طلعت ووزيرة العدل ردّتها لكذا سبب منن إعادة النظر بالتعيينات بالنيابات العامة. وع سيرتن، اجتمع النائب العام التمييزي والنائب العام المالي مع ممثلي المصارف وطلعوا باتفاق إنه يشرعوا الكابيتل كونترول علينا. وعملوا منه إنجاز وإنه هني يابا عم بيسيسرولنا أمورنا لأن سمحولنا نسحب كامل معاشنا باللبناني. تانكس بايبز. ومن هون لكنت تخطّيت بانيك الـ500 كلمة، خلينا ببيوتنا يا جماعة وبكرا نيتفلكس يشيل ما يخلّي.
