تميّز هيدا الأسبوع بالبلطجة على عدة مستويات: النائب هادي حبيش هاجم القاضية غادة عون بمكتبها لأن وقّفت بنت خالته مديرة النافعة هدى سلوم. شرطة المجلس النيابي كسرت سيارات متظاهرين وضربتهم هني ومارقين حد عين التينة. وطبعاً بلطجة المصارف على المودعين بعدها مكمّلة. من ناحية تانية، سجّل حضور مميّز للسلطات الدينية. تأجلت الاستشارات النيابية للإثنين لأن المفتي ما بدّه غير الحريري. والرهبنة المارونية استنفرت لأن تمّ توقيف راهبتين من جمعية «رسالة حياة» بتهمة إخفاء رضيعَيْن. ووصلنا معلومات إنه #بري_شي_بيخري و#جنبلاط_ضراط_ع_بلاط كانوا موست تريندينغ ع تويتر. بعد عندي إشيا قولها بس رح انتقل للأخبار السريعة لأن مجبورة بـ500 كلمة ومش ستيلي البلطجة.
شتّت وغرق جزء من بيروت والناس علقت نهار كامل بسياراتها.
وبعده وزير الأشغال بيقول إنه ما خص وزارته وبعدن رؤساء البلديات بيتفاجأوا من كمية الأمطار.
بطرابلس كبّوا نفايات على بيوت الزعما وهجموا على بلدية المينا وجبروا قسم من أعضائها يستقيلوا. وبعكار هجموا على المحافظ بمكتبه.
الشمال عم يعطينا دروس بفن الثورة.
ربحت شركة أصحابها مقرّبين من باسيل والحريري وجعجع مناقصة استيراد البنزين.
بتقول الأغنية: «ذاتس وات فريندز أر فور».
وعدنا يهتمّ بعكار. وعدنا بـ900 ألف وظيفة. لك وعدنا يتصوّر معنا سيلفي وما تصوّر.
وبدكن يانا نموت عالسكّيت ببيوتنا بطريقة كلاس؟
- مدام خبرينا شو صاير هون. - أنا دموازيل.
مجموعة أقوال مأثورة من الثورة.
القضاء تحرّك ضد هادي حبيش.
ع أمل نشوف العايلة الكريمة عم تتحاسب على كلّ ارتكاباتها.
عون: تعميم الفساد على الجميع أثّر سلبًا على سمعة لبنان في الخارج.
ابعتلن ماريو عون وشوف ملّا سمعة رح ترجعلنا.
جبران باسيل لبرّي: اشتقنا للحوار. فردّ بري: في هذا البلد لا بديل عن الحوار.
حواركن قبل الانتخابات قدّام ميرنا الشالوحي بيشهد على قوّة مشاعركن.
باسيل: نحنا ما بيهمنا نشارك بهيك حكومة لسبب واحد: لأن مصيرها الفشل حتماً.
ع أساس الحكومات السابقة كان مصيرها النجاح الباهر.
صحافي: مبارح إذا منحسب ثمن السيارات يلّي شاركت بمواكب رمي النفايات منخفض عجز موازنة 2020 على الأقل 0.5$.
مراسل: ليه ما عملت خطّة إنجاب ملائمة لحالتك الاقتصادية؟
- متظاهر: بدي لاقي شغل وطلّع مصاري - مراسل: ليه إنت فتت عالمدرسة شي حتى تلاقي شغل؟
مجموعة أقوال مأثورة من الإعلام.
وزير المال: لدينا أرقام مقلقة جداً عن تراجع الإيرادات.
لدينا معلومات مقلقة جداً عن احتمال عودتك وزير مال.
وزير العمل: من بين الحلول المتاحة اللجوء إلى صندوق النقد الدولي. ولماذا التهويل على هذه الخطوة؟
كلن يعني كلن ورؤية القوات الاقتصادية وحدة منن.
مروان خير الدين: هل من بلد في العالم تتعامل المصارف فيه بعملة غير عملته؟
هل من بلد في العالم بيقبل بيلّي عم تعمله المصارف بمواطنيه؟
مروان شربل: برّي طلب التحقيق بما حصل في عين التينة ومحاسبة المسؤولين.
وأنا طلبت إربح اللوتو والإثنين بيتحقق طلبي.
التقدّمي الاشتراكي: حان الوقت نرجع لفكر كمال جنبلاط والحركة الوطنية وليساريّتنا.
تو لايت يا بايبز.
بالأخبار الفنية،
شربل خليل بيرضى عن الثوار إذا راحوا يتظاهروا قدام بيت غادة عون دعماً إلها.
الممثل الثائر وسام حنا مع البنوكة، مع الحريري ومع الراهبات لو شو ما عملوا.
ونجوى كرم كتبت بالعربي ع تويتر للمرة التانية من 17 تشرين.
