مبروك للبنان. وأخيراً اتّفقوا (مش كلّن) على حسان دياب رئيس حكومة. يلّي ما بيعرفه، عنده مجلّد وزنه 2.7 كغ بيعرّف عن أعماله وعن علاقته بالصور وبوالدته. ومع إنه التيار والحزب كانوا ضدّ حكومة من لون واحد، إلا إنن انتهوا عم بيسمّوا رئيس الحكومة الجديد. وبانتظار نشوف إذا رح يقدر يشكّل حكومة، الجو بالشارع ولعان، ليتريلي. البلطجة مستمرّة وتطوّرت هالأسبوع بشكل لافت، وتطوّر معها القمع الزايد للقوى الأمنية. وصار في حيط بيفصل بين ساحة الشهدا والخندق الغميق. وبما إنه عندي بس 500 كلمة، ما رح خبّركن عن تفاصيل القبلة بين ربيع الزين وأنجي خوري.
المصارف عم تزيد إجراءاتها التعسفية وعالأرجح توقف تعطي دولار أول الشهر.
بس لا داعي للهلع.
شرطة المجلس عم توّسع أساليبها بالتعدي على المتظاهرين، من الضرب لاستعمال السلاح الحي لحرق الخيم.
طبعاً كلّه مبرّر لأن ممنوع حدا يجيب سيرة النبيه.
متظاهرين من طرابلس نزلوا يدعموا المتظاهرين ببيروت من بعد حملات القمع يلّي تعرضولها.
ومن وقتها، الإعلاميين بدّن يعرفوا إذا الطرابلسيين أخدوا فيزا قبل ما يقطعوا المدفون.
المتظاهرين بكفررمان والنبطيه وقفوا بوجه البلطجية وجبروهن ينسحبوا.
واكتشفنا ليلتها إنه «تشي غيفارا حرامي».
انتشر فيديو مصّوره شاب باليونان عم بيهاجم فيه الشيعة ونزلوا الشباب يضربوا المتظاهرين ع أساس هنّي المعنيّين.
ومن وقتها، منقعد مننطر إذا «الفتنة» رح توعى أو رح تخلّينا ننام.
«فش فتنة شيعيّة سنيّة، نحن بس بالفطبول جمهور نجمة ضد جمهور أنصار».
«ممنوع إهانة الأئمّة الإثنا عشر وخصوصي الإستاذ نبيه بري».
«أنا جايي من عكار. بس بدي قلّك شغلة، هيدا السؤال ما بينسأل، لأن نحنا جايين نتظاهر لمستقبلنا كلّنا وللبلد ومش لمنطقة».
مجموعة أقوال مأثورة من الثورة.
حسّان دياب رئيس حكومة بـ69 صوت و42 نائب ما سمّوا حدا.
لشو أصلاً يسمّوا، ما في لزوم.
الحريري: فشلنا كسلطة بأماكن كثيرة ولم نقدّم الكهرباء ولا الاتصالات.
عزيزي، إنتو طريق مضوّاية ما قدرتوا تقدّموا.
وزيرة الداخلية: موكب وزير المال أطلق النار على المتظاهرين.
ودغري تحرّك القضاء.
جبران باسيل: ما حصل في سوريا مهدّد بتكراره عندنا.
مشان هيك لازم تدافع عن حق اللجوء. تخايل نضطر نهرب إذا قرّرتوا تعملوا حرب وما حدا يستقبلنا.
الناس طردت فؤاد السنيورة من حفلة بالجامعة الأميركية.
رح نخسر صوته الحلو بالحفلات.
بالأخبار الفنية،
شربل خليل مش شايف إنه الحكومة الجديدة لون واحد لأن فيها «أورانج وأصفر وأخضر».
سمير صفير بدّه الحكومة الجديدة تردّ التجنيد الإجباري «ليتعمّدوا شباب وشابات لبنان بالوطنية».
رامي عياش نزّل أغنية داعمة للثورة تعب كتير ليلاقي كلماتها. بتقول الأغنية: أنا لبناني، بلدي قلبي التاني، عالغالي ما بيغلى غالي ما في أغلى من الأوطان.
نديم قطيش: عهد رفيق الحريري كان فيه فساد. كان يشتري معارضين بس كان لمصلحة الوطن ليمشي مشروعه.
وعم ندفع حق هيدا المشروع اليوم وكتير كتير مبسوطين.
مدير أخبار الـotv عم يتمسخر: شجرة الميلاد بطرابلس أحرقت لأن بعد ثورة 17 تشرين بطّل في طائفية.
متل من بعد ما صار الجنرال رئيس، بطّل في فساد.
ندى إندراوس عزيز: هل مسموح ومباح الاعتداء وشتم ورشق القوى الأمنية بالحجارة من قبل «الثوّار؟»
ومن وقتها انمنعت عن التغريد، وما بقي إعلامي من جماعة السلطة ما تضامن معها.
