ملاحظة: كل ما يرد في هذا المقال من نسج الخيال وأيّ ارتباط بالواقع هو مجرّد بارانويا. من جانب القارئ. أنا ما عندي بارانويا.
س:
ج: يمكن لأنو كتير بكذّب؟ مش ضروري بالأشياء الكبيرة. بكذّب بس إنسأل شو أكلت اليوم مثلًا. أو كم ساعة نمت.
س:
ج: ما بعرف ليش. يمكن تمرّد. إذا قلتلّك ليش، رح تصدقيني؟
س:
ج: lexotanil. أول مرة عطاني ياها بيّي كانت قبل ما سافر، كرمال الفوبيا من الطيران. عطاني 3 حبوب، بس قلّي آخذ نص حبّة، بس أنا أخذت حبّة كاملة احتياط. هيدي من 3 سنين، قبل بكتير مما بلّش تابع ملفّ المرفأ.
س:
ج: ما بعرف إشرح كتير. يلّي بعرفه أنو فجأةً بحسّ حالي كتير لوحدي، وبحسّ أنو كل جسمي روكب وعم كزّ عسناني.
بحسّ قلبي رح ينفجر كأنو حدا حاطط فيه 3,000 طن نترات أمونيوم أنا ونايم وناسي يخبّرني.
س:
ج: لا، وقّفت تحشيش من زمان، هلّأ بس بشرب.
س:
ج: قطعت بمرحلة ما أضهر من دون الحبّة بجيبتي. مش كرمال آخذها. قليل كتير أنو آخذها. بس برتاح وقت إمسكها بإيدي بجيبة الجاكيت لإتذكّر إنّها معي. مثل المسبحة.
س:
س: طب ليش ولا مرّة منحكي عنِّك؟ عادي، لو أنا دافع.
س:
ج: شو هالسؤال… لا، ما بكره حالي. بالعكس، بحبّ حالي. أكيد بحبّ كون أذكى، أو بلا حبوب عا وجّي أو إقدر قول الأشياء يلّي براسي من دون ما حسّ حالي عبء ع الناس يلّي عم تتسمّع، بس كل الناس هيك، وأكيد بحبّ حالي. ليش؟ ما لازم؟
س:
ج: كل ليلة تقريبًا.
س:
ج: بحس حالي حيوان. كل الناس بيحمّلوا دوا علبنان، إلّا أنا بالعكس. كل ما زور لبنان بفلّ محمّل معي مونة lexotanil من جارور بيّي لأنو بفرنسا ما بقدر اشتريه بلا راشيتا. حيوانات بفرنسا.
س:
ج: تخيّلي كمبيوتر بيقدر يتنبّأ إيمتا رح يصير زلزال. بس بيضلّ يخربط، وبيتنبّأ بزلزال كل يوم. مرّات كل ساعتين أو كل نصّ ساعة. بيزمّر ويبعمل أصوات إنذار، وبتنزلي إنتي تحت الطاولة، وبتتخبّي، وبتنوهلي، وآخر شي بيطلع عم بيكذّب.
س:
ج: ما فيكي! لأنو يمكن شي مرّة ما يكون عم بيكذّب! مرّات ما بيكذّب! مرّات عن جد!
س:
ج: وقت آخذ الحبّة عالطيارة ببطّل خايف توقع فينا ونموت. ما بيختفي الخوف. الخوف ولا مرة بيختفي، بس بصير حاسس إنو في حدا قاعد جوّاتي، وهو يلّي خايف، مش أنا.
س:
ج: هو أنا. صحيح، بس أنا كتير بعيد عنّه.
